MUSIC ZALONNAK

Zalonnak ti mi ah hin a phunphun a um. Midang nih kanmah cu kan ṭemṭawn hna hlah seh ti hi duh cio a si. Cozah zong nih mizapi hi zauk phung in kan hruai zokzok seh ti kan duh. Kan ram biaknak phung a hran suai mi ah kum 18 tang mah le duhnak ah um khawh lo, biaknak pakhat in pakhat ṭhial duh ah sok hmasa ding ti te hna a hung than tik ah Khrihfa cu thlacam in kan ṭang i kan duhlonak kan langhter. Khrihfa bu khat le bu khat karlak mah duhnak cio ah umṭhut ding cu kan doh fawn.

Maivan (facebook) chung in siseh, bia in siseh Zuun hla (Love Song) phan le sak hi zumtu nih kan hrial ding a si tiah Chinmi cheukhat lungput ah a um. Love Song kan doh ahcun dawtnak bia (Love word), dawtnak in cawlcangh (Love action), dawtnak kong ruah (Love thinking) le dawtnak mithmai vialte zong hrial kan hau hnga. Chinmi kan zuun hla (Love Song) khi ṭha tein ngaih ahcun zumhtlak sinak nun (kawl holh in titsa ngeih ) a herh zia langhtertu a si tiin ka hmuh. Ngaknu tlangval kar ah duhnak a ngei cang mi hna nih i hlen lo ding, thih tiang biakam let lo in dawtnak ngeih ding lawngte an si. Keimah bel a ka duh i ka duh pah ve mi ka co caah maw a si hnga Love song ka phuah manh lo. Ka hawinu a miduh co hlah kaw hlaphuah a ka fial i an sining a ka chimh hmasa hnu ah ka phuahpiak, Bil Sung nih DVD phel in aa chuah. Love song sullam a ṭha mi te cu Pathian hla midang soiselnak, mah faknak nih a thawtnak a tluk bak lo. Midang cu chim lo keimah hla hmanh ah fung 3 hrawng Pathian hla ti ṭung i, Thin khoih, a hniar zum pah mi, mineng thla phun phuah ka hmang.

Chinmi nih a tam bik kan duh mi timing cu Country le Slow Go Go deuh lawng a si hoi. Chan thar hla Rap, Pop tbk hna nih zalonnak an hmu hoi lo. Chinram piantharnak kan ngeihka ah khan Bu tenau cu khuang le hollaw guitar a hmang mi lawng nih Pathian lung kan ton tiah kan rak ruah. Keyboard le Electric Guitar, Drum hna a hmang kho mi Bu ngan deuh khi Satan thilri a hmang mi le hell tla ding ah ruah an si. Nihin ah cun a rak dohtu kha a ngeitu ah kan i cang.

Cu caah, Chinmi nih Music le Hla lei ah kan hmuhning kauhter a herh ngaingai. Pathian pahrang pek awṭhatnak a ngei mi hna nih Pathian thangṭhatnak hla kha Pulpit cung lawng in sak ding ti hna ruahnak a ngei mi kan um. Zumhnak khel lam pakhat lawng in cuanh ahcun a ṭha bik a si ko. Biachim thiamnak a ngei mi vialte tah Pastor si hlah u si law Baibal ca dah ti lo zeidang bia kakhat hmanh chim lo in maw kan um hna lai? Sianginn a kai mi ca ah, “Kaba ma ci” hla sak lo a hau. “A hme ram lai tlang” ti mi hla zong khi Khrihfa hlabu chung hmanh ah khumh a si cang i sak lo kan hau hoi hnga. Kanmah sak lawng hlah, kan hrial vekvek ahcun mi sak mi zong ngaih lo a herh. Ṭhitumnak hmun kan kal i Love song Phel an chuah hmanh ah kan hna bak phih a herh. Rian ṭuan a thiam mi vialte tah, Biakinn saknak lawng ah ka zungthiamnak hi ka hman lai, cozah zung le pumpak inn hna sak cu ti awk kan ṭha maw?

Biadonghnak ah; Ka hawipa cu Pathian thangṭhatnak dah ti lo zei hla hmanh kan sak ding a si lo a ti tawn. Mah hmanh ah cun Khuang ṭhuanh khawh phun Country beat a si lo mi Slow Go Go, Vaih 3 hla ti phun kan i thawh ahcun pumh lio a si nain a kan sik i hla dang aa thawh zokzok tawn. Hla hi phun zeizat dah a um ti zong ruah awk a hngal lo. Kutbengh, kepha, lam awk ṭha lawng khi hla ah a ruah. A ca ah hla dang vialte le Timing dang vialte nih zalonnak an ngei kho ti lo. Ṭaang te i domh, mit te i chinh in thinlung feeling he sak phun, Kut te zong thlir, i hlawhlen theng lo in sak phun, zohchia khenhhru ngaknu tlangval aa zuldawi mi hna khuatli zaanṭim laamnak ṭha music bantuk ngaingai bel si lo in Biakinn chung le Pathian thangṭhatnak ah a zatawk pum cawlcangh ter phun hla ti hi kan nun nih thleidang thiam seh ti ka duh. Kan rampi uknak lei Zalonnak (Democracy) lawng cuanh le ruah siloin Dingdi ka capar reltu nih cun Hla le Music hna nih an zalon cio nak hi innka hunpiak khotu si i zuam hna u si.

F. Za Thang

CACCHOME Written by:

Be First to Comment

Leave a Reply

Your email address will not be published. Required fields are marked *