Damnnak Thazaang

Damnnak Thazaang

COVID-19 Zawtnak Kong Ah Siaherhnak

Thazaang Petu : Pu Zung Lian

COVID-19 in a zaw mi ka si ve caah ka ton mi cung in ka ruah mi le ka hmuh mi vun in hrawmh ve kan duh hna. A hmasa bik ah COVID-19 zawtnak hi fir ruang le sualnak ruangah a chuak mi a si lo ti hi kan i fian a herh. Cucaah COVID-19 in kan zawt tikah kan thuh lo ding biapi tuk. A ruang cu zapi in i bawmhchanh a hau mi zawtnak a si.

COVID-19 hi sii-ai dah ti lo cun lungthin in tei khawh hi biapi a taktak mi a si. Cucu taksa chunglei a ṭhawn ding kha a herh tuk. Cucaah thazaang ṭhawnnak tampi eipiak a hau. Cu bantuk ei khawh nakding ah kan pawngkam a dam mi hna nih an kan bawmh a herh.

Coronavirus hi keimah nih ka hmuh ton mi ah cun phun hnih in a tongh (attack) hna. Phunkhat cu taklinh, lufah, thil rim theih lo, thadih le khuh an si. Phunhnihnak cu zeihmanh a dang um lo in chungtlik a si. Chungtlik hi ṭihnung deuh mi si tiah kan umnak sibawi (doctor) te nihcun an chim.

Zei ban tuk phun hmanh avasiah Coronavirus zawtnak dohnak ca ah a ṭha bik cu thazaang in tei le lungthin in tei a si. Keimah ka zawt lio zong ah chikkhat te ahkhin ka thazaang dih ning a rang ngai. Cucaah thazaang umnak ding ei le din a biapi taktak. Cun kannih umnak ah cun ungti haang (Coconut) hi tampi in an kan dinter. Thazaang a um mi thingthei haanghnah le caw ruh ciar/chuan, ngasa huut ti bantuk in i cenh a hau.

Cun, kan thinlung in tei bak a hau. Cuap lei in a kan lak (attack) ahhin chungtlik zong ai tel chih kho ko. Tikah kan thazaang chikkhat te ah a dih zuahmah. Cu tikah lungdongh a fawi. Kan umnak tarpa pakhat zong a thinlung nih a chei lo dengmang. Heh tiah lungcan an von pek le a hun i hrim i atu cu a dam cang. Tutan kei ka zawtnak cu ka cuap in a ka tongh pinah ka chung nih a ka tlik i, nikhat hrawng cu ka zual ngai i ka temtuar ngaingai.

Chim ding tampi um ko. Nain biapi bik mi cu thazaang le lungthin in kan tei hrimhrim a hau. Coronavirus hi vaṭṭha ca ah cun taksa fah sawhsawh men te khi a si. Nain vanchia ca ah cun thihnak tiang an phanhpi hna. Cucaah zeirel lo zong in um ding si lo. Cun ṭih tuk in um ding zong si fawn lo. Na zawt tikah sii-ai bochan lawng si loin na thazaang le na thinlung in tei khawh hrimhrim rak i zuam hraam uh.

Chinchiah:
Pu Zung Lian hi New Delhi ah chungkhar he khuasa mi a si.


Leave a Reply

Your email address will not be published.