CACC Hmailei Ka Saduhthah

26 Chiapa (July) 2021, Kawlram nih calei ah a sang bik laksawng National Literature Award-2012 rak pek mi, Laimi kan nunphung le kan caholh surlupi Pu Stephen Ni Kio nih taksa thihnak in a kan liamtak thawng ka theih bakin khurkhua tampi ka ruat. Kan nunphung le caholh a daw i a tharchuahtu minung nih an kan liamtak thluahmah va si kaw, hmailei chan chungah zei kan va lawh te hnga ka ti. Keimah pumpak khuaruah in khuakhing ka khak i kan miphun nih nunphung le caholh kongah siseh, kan miphun konglam ah rinhchanh mi le bochan mi CACC nih fak deuh in rian a ṭuan hau tihi, ka biachahnak a si. Cucaah CACC hmailei ka saduhthah ti’n chunmang ka manh mi tete bulbul tantan in ka van com.

1994 ah Chin Association for Christian Communication (CACC) ti’n, 1988 lio ah dirhmi Chin Christian Literature Society (CCLS) cu thlen a rak si. CCLS cu Ca le Holh kilven, ṭhanchoter ding hmuitinh he rak dirh mi a si i, CACC ah thlen a si hnu, nihin a dirhmun ah cun Department pahnih: Literature and Publication le Art and Culture, telh in kaupi rian a ṭuan mi rinhchan tlak taktak pakhat ah a hung cang. Nihin tiang ah, caholh le nunphung kong ah siseh, thil dang kong zongah bochan tlak taktak, miphunpi kilhkamhtu le lumsattertu a si. Miphunpi aiawh in rian a ṭuan kho ding, thil a ti kho ding a si bantukin, retheih i khinh deuh hna sehlaw, hmailei ah khin hi hna zong hi kan ruahpiak kho te hna seh tiah ka saduhthah cu:

Laica Cawnnak Karhter

Kan Laica tuanbia zoh tikah, kum note a si rih. Kanmah tein kan i ser mi ca a si lo, Laitlang a phan mi Miraang pawl nih anmah awchuah zulh in an rak tuah mi ca a si. Laimi nih Laica a tuah hmasa bik tiah kan timi Surgeon Major A. G. E New Land nih Rangoon ah 15-3-1897 ah A Practical Handbook of the Language of the Lais as Spoken by the Hakas and Other the Allied Tribles of the Chin Hills (P.687), hi hmuh hmasa bik a si. (Sui Mawng, Laica Seminar, Lai Baptist Church, Yangon, June 4, 2011). Asinain Laica le Laiholh kong a tawngthamtu Professor Dr. George Beddel nih Laica le Laiholh kong ceihhmainak cauk pakhat a rak chuahpi tik lawng ah New Land nakin tuan deuh ah a rak tuahtu a um kha kan theih. Amah cu D. J. C. MacNabb, B. Sc, a si i Hakha ah a hmasa bik Britist Political Officer a si i, Chin Hills uktu ah an chiah mi pa a si (Ptr Lian Chawn tial mi chungin). A kum in kan chim a si ahcun, Ca kan ngeihnak hi liamcia kum 100 ah khan a rak si cang nain Caholh cu hnuhniangpi ah a hung di. Lai cafang le Lai holh cauk hmasa bik kan ngeihnak cu kum 100 lengkai a si cang nain Caholh timi ‘Literature taktak a keuh hi cu 1960 hnu lawng in si dawh a si. F. Lai Len nih, “Lai cafang ser cu kum 100 fai a si nain Caholh taktak a keuh hi cu 1960 lawng in a si,” ti. Cucaah Laimi nih Caholh taktak kan ngeihnak hi kum 60 fai hrawng lawng a si rih tinak a si hnga (Ptr. Lian Chawn tialmi chungin). Hi kum 60 fai chungah cauk chuah mi hi uk 1,000 fai hrawng a si an ti. Lai caholh in ṭialmi phun ahhin Muko, Journal, Cazual tbk hi pehzulh in chuah mi an si i, adang cauk kan ngeih mi cu biaknak kong hi a tam bik an si. Ramkhel, ngandamnak, ningtak hngalhnak (science), technology, etc hna hi cu kan ngei lo tluk khi an si. Cucaah Laimi nih kanmah caholh tein vawlei thilcang kong siseh, hngalhkauhnak lei ah siseh, tampi kan i hlawkpi khawh nakhgna, a tanglei bantukin Lai caholh kan karhter ah a ṭha hnga maw?

Private Sianginn ah Cawn

1962, U Ne Win cozah hruai hnu in kan caholh a ngaktah i thih bawh in a um. Cuticun caan sau tuk Laica cawng kho loin kan um hnu, 2015 U Thein Sein cozah a kai hnu ceo in Acozah sianginn ah tang 3 tiang cawnnak nawl kan hung ngei. Kum tam tuk ah kan caholh a kan thahpiak caah kan fanau Laica ṭial kan thiam ti lo. Cucaah a thar bakin Laica ṭial cawn kan hau. Atu taang 3 tiang cawnnak nawl kan ngeih mi hi a za lo, sianglairuun tiang cawn khawh dingin nawl hal a biapi tuk. Cun kan ram cozah sianginn nakin private sianginn kai hi mizei paoh nih duh deuh a si te lai tikah, Private Sianginn ngeitu vialte nih Laica kan chimh chih hna a herh. Nihin tiang keimah hngalh tawk ah, Hakha le Thantlang hmanh ah Private Sianginn pali-nga an si. Anmah le CACC i chawnhbiak in Laica cawnnak caan ser a biapi hringhran. Cucu thil si kho tuk a si. Zoh ulaw, Australia zong ah Acozah hngalhpinak in sianglairuun tiang an cawng, Mizoram, Lawngtlai District ah taang 8, USA, Indiana University zong ah cawn ding timhlamh a si ti si. Chim duh mi cu, kan umnak hmunhma le ram, khua cio ah siseh, pumpak in dirh mi sianginn ah siseh, Laica cawn hi a biapi tuk mi ah ruat dih usih. Cucu miphun dawtnak lungput a langhnak zong a si.

Thil Min Phuah

Lai caholh thiam cu ka si lo, Miraang le Kawl holh thiam zong ka si lo, nain Laica/ caholh a chambau deuhnak a si ko rua, tiah ka ruah mi cu, thil min kong ah a si. Lai caholh a rum tuk kan ti rualrual in, thil min ah miphun dang holh kan i hlan/cawi mi a tam tuk. Hi thil min ahhin innchung tangah kan hman mi thilri siseh, thingthei siloah theitlai siseh, saram min siseh, kan tonghtham mi le hman mi thil pin ah, nifatin kan i pehtlaihnak le chawnhbiaknak ah hman mi biafang tampi, miphun dang holh in kan auh mi le chim mi an um. Hihi CACC Lai Caholh Ruatkhaangtu nih kan zohfelpiak hna sehlaw, min thar a kan phuahpiak khawh ahcun a ṭha tuk hnga. Cu min thar an phuah mi cu, Laica cawnnak ah chimhchih si hna sehlaw, ngakchiat tein chimh, cawnpiak tikah an hna ah a lut lai, an thinlung ah a caam lai i hmailei ah cun kanmah holh tein thil min tampi kan ngei kho lai. A si khawh bang ahcun, min thar an phuah/bunh mi thilnung (saram tbk) siseh, dumhau chuak tisik anhnah le thingthei hna le thil dang tete min thar phuah/sak mi pawl min le hmanthlak he cauk in kan chuahpiak kho hna sehlaw, cu nih cun tampi a kan bawmh fawn lai.

Lai Museum

Lai Museum ti tikah, hlan thil hlun pawl chiahnak inn khi chim duh mi a si. Hihi ram ṭhangcho nih cun ngeih dih mi a si. Nunphung kilvennak a si pin ah, mileng sakai a lemtu thil pakhat zong a si chih. Nihin tiang Laitlang ah kan ngeih mi hi Museum ka hngalh khawh mi, Surkhua ah pakhat, Halkha ah pathum: Zion Baptist Church nih ngeih mi Rev. Van Hre Inn-Chin Traditional Museum, Khrihfabu 50 fai funtomnak Hakha Baptist Association (HBA) nih ngeih mi Missionary Museum, Cozah ngeih mi Cultural Museum le Pu Tan Ki ngeih mi Cultural and Archaeological Museum an si hna. A va lengkai mi tete nih thilri zong an tling ngai an ti. Kan ngaknu tlangval cheukhat nih umhar phen ah an va zoh sawhsawh lio ah, an cawnnak he pehtlaiin siseh, hngalhkauhnak caah a kherhhlai mi tampi zong an um ve. Kanmah miphun lawng an si lo, miphun dang zong nih an bih ngai ti si.
Cucaah CACC nih Museum tuah ding tiang chunmang manh sehlaw, cu Museum ah cun Caruuk (Library) tuahchih in, Museum ah chiah mi thilri kong kha holh phun thum: English, Kawl le Lai ti’n ṭial mi cauk tampi pin ah, kan fanau sianglairuun le sianghleiruun kai ca thahnem ding mi cauk tampi zong i chiahchih kho sehlaw a va ṭha tuk hnga. Kan tuah khawh ahcun a thleng cuahmah mi kan vawlei ahhin miphun dang sin ah kan miphun a lang chin lengmang lai, kan khua le kan ram a lumsa chin lengmang lai, kan miphun fanau ṭhangthar zong nih kan miphun kong le lam, kotho nunphung vialte zong a thar in an hun hmuh le hngalh ṭhannak a si hnga. Cauk in ṭial mi pin ah, thil pipa a si mi Lai kutchuak siseh, hlan kan miroling pawl hna zong an hmanthlak tete he an konglam le tuanbia ṭialchih in anmah le umnak dal (khaan) cio ah, zoh pah in an konglam rel khawh ding tiang khin tuah hei siseh law (technology in siseh, lung cung in ṭial mi tbk).

Ca Namhnak Seh

Kan Laimi sining cuanh tikah, atu GZ (generation Z) chan hi, khahlan chan nakin ca a duh deuh mi, carel le caṭial a huam deuh mi an si ko rua. Kan ram uknak nih a rak kan rialdip tuk ruang zong a si kho, kan nu le pa tam-u cu carel phun cu an thisa nih a huat in huat. Sinain atu kan chan ahcun carel le ṭial kan huam ngai cang hna i Hakha, Thantlang hrambunh phunglut thawngzamh chuah mi thawngpaang zong a kal ngaingai. Cun mibing nih chuah mi cauk tete zong Laitlang chungah cun kal a cak ko. Hi vialte kan chuah cia mi cauk hna hi Kawlram deuh ah chuah an si. Atu (Kawram ka chuahtak hnu) ah Hakha ah Ca namhnak seh a um maw, ka hngal lo. A va um hmanh ah, zohco tein (quality ngei tein) kan chuah khawh chinchin ngakhnga, CACC nih seh ṭha mi a damhkhan i a tuah khawh ding a biapi tuk fawn. Tangka hmuhnak a va si pin ah, anmah nih an ngeih cun cauk ṭha tam deuh a chuah fawilaang deuh hnga.

Thilthuam Chuah

“Chin” timi chungah phunchung tampi kan um hna i thilthuam, thi le hlawn kan ngei cio hna. Kan miphun sinak (identity) a langhtertu pakhat zong a si i a biapi hringhran. Kan thilthuam, kan ṭhi le hlawn a ngeitu hi, kanmah Chin miphun lila kan si, miphun dang an si lo. Amahbelte, kan miphun thilthuam a sawksaamtu le man (vulue) a niamtertu zong kanmah lila kan si hoi. Kan thilthuam in chawhrawl pawl nih, bawli ah nan tuah, kedan ah nan tuah, chungnawh ah nan tuah i hrukaih phun a simi kip ah nan ser. Hihi miphun thilthuam cawisan le sunlawih a si lo, “sawksaam” a si. Kan upat thiam a biapi tuk.

Pathian dawtnak thawngin kan miphun zong kan karh iahmah, vawlei killi zong ah kan i ṭhekdarh i kan phaknak kip ah zohhlei co, mit cungcuang miphun thilthuam cu, Lai Thilthuam a si zungzal. Zoh ulaw! US ram, Florida ah tuah mi avoi 69th Miss Universe Competition zong ah vawlei cung thilthuam dawh bik minṭhatnak a co. A hrukaihtu Kawlram aiawh Ma Thuzar Wint Lwin (Candy Thuzar) mui le sam, mi le rum ruangah a si thlu lo, mit cungcuang thilthuam a si caah a si ko. Hi tluk in man (value) a ngei mi thilthuam, a sungsai mi thilthuam ṭhawnternak ah CACC nih rian a ngei. Anmah nih rianṭuantu laak (hiring) in tampi chuah khawh ding chunmang manh sehlaw a ṭha hnga. Kanmah miphun a si lo mi nih kan miphun thilthuam ser le chuah a si mi hi a poi. Pumpak in kanmah miphun thisa thiamtah kutzung thiam nih an tah i an serchuah mi tampi a um ko lai, sinain keimah hngalh tawk ah min langsar in rianṭuantu tampi he kan thilthuam thazaang a ṭhawntertu cu Mai Anna Biak Ṭha Mawi hi a si. Annih hi Facebook ah Aidii Collection in kan thilthuam phozar lengmang mi Aidii Weaving House (Social Enterprise) a dirhtu le ngeitu a si. 2014 in a thok i caantling (fulltime) in minung 8 le anmah kuttang ṭuan a si nain anmahle inn cio ah thiam tak mi 50 leng ti’n, rianṭuantu 100 fai ai ngeih hna. An hmuitinh cu kan miphun nunphung le sinak langhtertu thilthuam ṭhanchoter pin ah, thiam-tah kutzung thiam dingin minung sersiam zong an i sehchih. CACC zong nih lam pakhatkhat kawlhawl in, Chin chungah phunchung dihlak (Hakha, Falam, Tedim, Matu,..tbk) nih ngeih mi thilthuam ṭhanchoternak lam a tuah ding a biapi fawn.

Channel le Caruuk

Ram ṭhangcho hna nih ram le miphun sersiamnak hriam ṭha phun khat ah an ngeih mi cu, Tv Channel, Radio Station le Caruuk (library) an si. Kan Chinram zong ah cucu um kho sehlaw vawlei a bi chinchin hnga. CACC nih Tv Channel in Laiholh kilveng seh, Radio in kilveng sehlaw, fanau caah cun Laiholh philh a si ti lai lo. Naihrawngte Laiholh in Channel thlahmi tete zong kan fale tam tuk nih a zoh an duh tuk. Channel lawng a si lo, ngakchia zoh awk cartoon pawl tampi in tuah kho sehlaw ṭha chinchin lai. Cun caruuk (library) hi acunglei i ka chim mi khi khuachung ah a si khawh lo ahcun, adang tein caruuk lianpi ngei kho sehlaw, cu caruuk hmun ahcun computers in internet hman khawhnak tiang khi tuah kho sehlaw, secular lei cawng mi kan fanau caah siseh, biaknaklei cawng mi kan fanau hna caah tampi ṭhathnemnak a um hnga. Caruuk ah cauk phunkip a chiah mi an i ṭhathnempi pin ah, computer hmangin research tampi an tuah khawh hnga.

Biatlangkawmnak

Hi vialte tlamtlinh dingah ngeihchiah a biapi tuk ti cu, chim hau lo a si. Miphun caholh le nunphung kilvennak ahhin nunnak hmanh a liam si kaw, tangka in hlawknak a chuahpi mi an si lomi ruahnak nih thil ṭha a si ti hngalh ko nain tuah lo cu, thil ṭha a si hnga lo. Cun caholh le nunphung kilven timi hi, a tuan tuk ti a um lo, a tlai tuk ti bel cu a um. A tlailei khel kan si cang caah kan hla le kan laam vialte kan thlau dih cang hna ti awk a si. Hi vialte zong hi tharchuah khawh nolh ahcun a ṭha tuk hnga. Cun Laica cawn ding zong a dotdot in kan chuahpiak hna sehlaw, cu an chuah mi cu Laica cawnnak khua le ram, hmun le hma kip ah phakter kho sehlaw, cu ning in kal ahcun, kan dihlak kan i khat kho hnga. Adonghnak ah, ca le holh, miphun kilvennak ah CACC lawng nih ṭuanvo a ngei lo ti hi, kan dihlak nih kan hngalh a herh. Caṭial kho nih caṭialnak in, carel kho nih a relnak in, kutzung thiam nih a thiamnak in, chimrel thiam nih a thiamning in kan kalpi i kan dihlak kan ṭanrual ti ahcun, kan ca, holh le nunphung a nunkhua sau ko lai; caholh le nunphung nunkhua sau cu, miphun damnak le nunkhua saunak a si.

Lunglawmhnak tampi he
Carson Twintwin

CACCHOME Written by:

Be First to Comment

Leave a Reply

Your email address will not be published. Required fields are marked *