Carson Twintwin

2021 Chiapa 17 (17 July 2021) lu kheuh in lungrethei le thlaphang in ka um lio ah ka pu, Rev. Dr. Peter Za Hlun Thang he kan i chawn. Ka innchungnu (Kawlram ah a um mi) COVID nih thah hrulh a timh ve caah zei ti tal in bawmh khawhnak lam a um hnga maw ka ti. Culio ah cun, “Ka fapa COVID siseh, zawtnak dang vialte in damnak tha bik hi, Jesuh a si. Pathian kha pakhatnak ah na chiah i thlacamnak in na zawtfahnak le lungretheihnak vialte na chimh peng a si ahcun, na thlacamnak leh awk ah a hnachet lo,” tiah a rak ka ti. Mah thawk cun kan pahnih in Pathian kan chawnṭi, kan nunnak, kan lungretheihnak le zawtfahnak vialte kan chimhṭi i, a fale aunak ngaihawk le lehawk ah a hnachet lo mi Pathian nih COVID in damnak a kan pek taktak. Pathian min zong kan thangṭhat.

Caan a hung kal i US hrambunh National Center for Biotechnology Information (NCBI) nih an thlah mi ca ka rel. Hi NCBI hi vawlei taksa pum in kan nunnak ah rinhcanh ngaingai mi an si. Sii-ai kong siseh, thlopbulnak kong siseh, minung nunnak chanhchuah ding hmaithlak in rian a ṭuanmi an si. Phundang in kan chim ahcun, anmah kut ah nunnak a um, ti awktlak khi an si. Cutluk cun bochan mi le taksa nunnak tlaitu ah ruah mi hna nih cun, “Pathian lawnglawng hi damnak petu a si; kannih minung (siibawi) le sii-ai (medicines) hna hi cu, Amah Pathian sunparnak a langh nakding ca’h le thil ti khawhnak a langh nakding men khi kan si. Pathian nih thlua an kan chuah lo le sii-ai a hman i thlua a chuah lo ahcun, minung nunnak khamh khawhnak ṭhawnnak (power) kan ngei lo,” tiah Bible cacaang chirhchan tampi he an ṭial. Anmah lawng hlah, zumlotu kan timi siibawi thiamsang le minthang vialte nih mi pakhat nunnak le thihnak an kut chung a um lo zia le Pathian lawnglawng nunnak le damnak a si zia, an thlopbul mi midamlo sin ah an chim peng.

Cun Catholic Baibal phun khat a si mi, Ben Sira cauk timi Sirach 38:1-15 na rel a si ahcun, “Siibawi (doctors) hna fimthiamnak le thil ti khawhnak siseh, Sii-ai vialte hna hi, Pathian nih a sunparnak langhternak caah a kan pekmi, chiahpiak mi an sinak na hmuh lai. Langhter ka duh mi cu, kan lunun ngandamnak kong ah siseh, thihnak kongah siseh, zei thil kan tuah mi kip ah Pathian tel lo in zeihmanh a si khawh lo zia kha a si. Tutan ah vawleipi nih a tuar i minung 4 million lengkai nih an i thihpi mi pulrai damnak petu taktak zong Pathian lawnglawng a si. Amah sin ah na zawtnak le nunnak na ap a si ahcun, zumtu a fale hna thlacamnak leh dingah a hnachet lo mi a si. Ruat hmanh! Jesuh vawlei a tlonlen lio ah minung zei zat dah a damter hna? Khuachia nih a tuah mi hna, minung cazin hmanh ah telh lo mi zong a damter ko hna; an fih bik mi minung thinghmui takphar zawtnak in a zaw mi zong a damter ko hna; minung khuaruahnak in damh khawh ti lo mi zawtnak ngei zong a damter ko hna; i chuahpi mi pum tlamtlin lonak a ngei mi siseh, rawhral khawnden ruangah ngeih mi taksa pum tlamtlin lonak (mitcaw, kebai, kutbul, hnachet,..tbk) zong a damter ko hna. Damnak petu a si ti a hngal i a fuhmi hna poh, taklawng in a kirter hna lo (Mark 1-4).

Cucaah na nunnak Jesuh chan hmanh, na thilrit an chan lai. Cucu Jesuh biakam a si (Matt.11:28-30). Jesuh nih kan thilrit chan ding ah a kan auh tikah, thil pahnih a um; cucu taksa damnak le thlarau nunnak a si. Na si ningpi in na nun na ap tikah, santlai lo mi na sinak, bawmhchanh herh mi na sinak le chanhchuah hau mi na sinak le khamh a herh mi na sinak na hei chimh khi a si (Luke 5:31). Amah bochan in na si ning dihlak kha a kehram na bungh a si ahcun, taksa in na zawtnak a dam lai i zungzal thihnak in na thlarau nun a luatter lai. Cucaah taksa in na intuar mi ruangah lungder in um hlah, na ruahchannak zong dong hlah seh; zei cah ti ah hi na ton mi harnak chungin Pathian nih a thianghlim mi a dawtnak hngalhter an duh caah a si kho. Cun harnak chungin a mithmai hmuhter an duh ca’h zong a si kho. Lunun ngandamnak na ngeih lio i dam man liam loin an damtertu aho a si ti ruat lo in nangmah duhsalam in na tlonlen caan le taksa nganfahnak in ngandam a sunlawi zia le damnak petu ahodah a si hngalhter an duh ca’h zong a si kho fawn. Cucaah, vawlei siibawi fimthiamnak siseh, vawlei thilri le sii-ai in na thlopbulnak lawng i rinh hlah, cu na hman mi vialte cungah nawlngeitu Pathian, taksa le thlarau nun damnak Calvary Siizung ngeitu Jesuh sin ah na harnak chim hmanh, na thilrit a zaang ko lai. Damnak tling hmuh khawhnak cu Jesuh lawnglawng a si.

Theihternak:

Carson Twintwin hi a chuahkehnak cu Thantlang peng Saikah khua mi a si. India ram Bhopal in B.Th; Mumbai in M.A.B.S le M.Div degree a hmu mi a si. A sianginn kainak ah ca a thiam i mark sang pipi (honor) in teinak a hmu mi a si. Atu hi Australia ram Melbourne khua ah amah lawng in khua a sa mi a si. (An nu cu Ngun Meng a si i anih cu Kawlram ah a um rih, an i ton khawh nakding ah thla kan campi). Amah hi calei ah duhnak a ngei taktak mi a si i “Lai Nunphung Tenek” ti mi ca uk zong a ṭial i CACC min in kan chuahpiak. Capar (article) zong 20 leng a ṭial cang mi a si. A cungah kan in lawm.


Leave a Reply

Your email address will not be published.